Ourense prepárase para o primeiro episodio de temperaturas extremas do verán, que prevé que os termómetros superen os 40 graos nos vales do Miño e do Sil. Tras unha semana de inestabilidade, unha masa de aire sahariano provocará un ascenso térmico ata os 43°C durante a festividade de San Xoán.
A escalada comezará esta fin de semana. O domingo 21, coincidindo co solsticio de verán, a capital ourensá xa roldará os 39 °C. O pico desta onda de calor agárdase entre o martes 23 e o mércores 24 de xuño, cando as máximas poderían alcanzar os 43 °C na cidade. Ademais, prevén noites tropicais con mínimas que non baixarán dos 21 °C.
A causa deste episodio é un bloqueo atmosférico sobre o golfo de Xénova, combinado coa formación dunha DANA ao oeste da península ibérica. Esta configuración impulsará aire moi cálido e seco desde África, creando unha cúpula de calor. A intensidade final dependerá da posición exacta da DANA e do anticiclón, e poderían baterse récords absolutos en Galicia.
Ante estas previsións, recoméndase extremar as precaucións coas persoas máis vulnerables, especialmente nas horas centrais do día. A nivel medioambiental, a combinación de calor, po en suspensión (calima) e posibles tormentas secas incrementará o risco de incendios forestais, nun escenario crítico que coincide coa celebración de San Xoán e o acendido de milleiros de fogueiras.
O grupo municipal do PSOE criticou a "inacción" do goberno local fronte ás ondas de calor, reclamando medidas estruturais como un Plan Municipal de Adaptación á Calor. Propoñen habilitar refuxios climáticos e aumentar as zonas de sombra e a arborización urbana, baseándose nun informe que sinala Ourense como a cidade con peor acceso a zonas verdes de España.
