O Tribunal Supremo non admitiu o recurso de casación presentado polo Concello de Ourense contra a sentenza da Sección Primeira da Sala do Contencioso-administrativo do Tribunal Superior de Xustiza de Galicia (TSXG). Esta sentenza confirmaba a anulación do cesamento do interventor municipal, Gonzalo Alonso, por vulnerar os seus dereitos constitucionais.
O alto tribunal salientou que "os feitos e a valoración destes son aspectos que non poden ser obxecto de exame no recurso de casación". Engadiu que "non se xustifica suficientemente" a concorrencia de supostos que permitan apreciar a conveniencia dun pronunciamento da Sala ao respecto.
A resolución do Supremo chega despois de que o TSXG desestimase o recurso de apelación do Concello contra a sentenza inicial do Xulgado número 1 da Sección do Contencioso-administrativo do Tribunal de Instancia de Ourense. Nesa primeira resolución decretábase a nulidade do cesamento do interventor local ao entender que foran "vulnerados" os seus dereitos fundamentais.
O TSXG coincidía coa resolución inicial en que, ademais de existiren defectos formais relativos á falta de competencia e á inadecuación do procedemento, o decreto local que cesaba a Gonzalo Alonso do seu cargo vulnerara dereitos constitucionais do recorrente. A sentenza sinalaba que non se pode "remover" a un funcionario de carreira agás a través dun procedemento disciplinario e polas causas legalmente establecidas.
Coa decisión do Supremo de non admitir o recurso de casación, mantense así a anulación do cesamento do interventor municipal de Ourense.
