Este crecemento non só se reflicte na adopción, senón tamén na profundidade do seu uso. O 57,4% das empresas emprega tanto ou máis software libre que privativo, destacando especialmente nos servidores, onde o 50,8% opta maioritariamente por solucións abertas e un 27,7% as usa de forma exclusiva.
As aplicacións máis estendidas inclúen navegadores, ferramentas ofimáticas, xestores web e correo electrónico, todas elas con niveis de uso superiores ao 49%, o que subliña a súa integración nas tarefas cotiás das empresas.
Por provincias, Ourense (96,3%) e Lugo (95,5%) lideran a implantación, superando a media galega. Ademais, o 46,7% das empresas TIC galegas comercializa software, e destas, un 46,2% ofrece solucións de software libre, reforzando o seu papel como provedoras.
Entre as vantaxes máis valoradas figuran o menor custo, a personalización e a independencia tecnolóxica, aínda que persisten retos como o descoñecemento, a falta de formación ou problemas de compatibilidade con sistemas xa implantados.
