A conta atrás para unha nova edición do Rally de Ourense xa comezou. A proba, que chega á súa 59ª edición tras 60 anos de traxectoria (cunha única interrupción en 1972), consolídase como unha cita deportiva de referencia a nivel nacional, avalada pola Escudería Ourense.

O nivel competitivo está garantido, cunha lista de inscritos que inclúe ás estrelas do Supercampionato. Entre os favoritos atópanse “Cohete” Suárez, que chega con vitorias previas, xunto a pilotos locais como Javier Pardo, Iván Ares e Jorge Cagiao. Tamén se esperan fortes rivais como Diego Ruiloba e Sergi Pérez.

Unha das principais novidades desta edición céntrase na seguridade e na xestión dos afeccionados. O presidente da escudería, Jano Fraga, explicou que se implantará un novo sistema de seguridade a través dunha aplicación en liña e que se redobrarán os esforzos para delimitar zonas seguras para o público. "En todos os tramos estará prohibido emplazarse o público excepto nas zonas amarelas, que estarán indicadas", sinalou Fraga, engadindo que se busca "xerar moitas zonas válidas para os afeccionados" en lugar de centrarse en prohibicións.

Jano Fraga tamén quixo destacar o papel da afición, sinalando que o cartel desta edición é un agradecemento a eses "'crazy fans' que dan tanto calor" e que levan o nome de Ourense por todo o campionato.

A proba constará de 469 quilómetros de percorrido total, dos cales 149,24 serán cronometrados. A inscrición xa está pechada, confirmando a participación de todos os grandes nomes do campionato.