O encontro centrouse en explorar sinerxias para mellorar a formación de profesionais do sector agrario e para impulsar a visibilidade e o valor engadido dos produtos galegos con calidade diferenciada.
Martín Alemparte destacou a colaboración xa existente entre a Consellería do Medio Rural e o Inorde na posta en marcha da Escola de Pastores de Galicia. Esta iniciativa, que se desenvolve nas instalacións do Centro de Desenvolvemento Agrogandeiro de Xinzo de Limia, forma novos profesionais da gandaría en extensivo e serve de exemplo de cooperación institucional para achegar formación especializada ao territorio.
Ademais, analizáronse posibles actuacións conxuntas para potenciar a promoción dos produtos agroalimentarios galegos de calidade diferenciada. O obxectivo é incrementar o seu coñecemento entre os consumidores, reforzar a súa presenza en accións de divulgación e xerar un maior valor engadido para os produtores e para o conxunto do territorio.
