A Conselleira de Vivenda, María Martínez Allegue, confirmou que o seu departamento iniciará a revisión do Plan Xeral de Ordenación Urbana (PXOM) da cidade de Ourense. Esta revisión prodúcese despois de que o Concello iniciase os trámites para comprobar se as correccións esixidas pola administración autonómica hai un ano axústanse á normativa vixente.
Segundo explicou a titular de Vivenda, a solicitude de informe do documento foi remitida por Rexistro e vía correo electrónico á Consellería. "Temos xa a solicitude de informe dese documento e estamos á espera de que se remita o documento en si para que sexa analizado dende un punto de vista técnico", sinalou Martínez Allegue.
A conselleira calculou uns tempos de revisión de "un mes para verificar que a documentación está administrativamente completa e requirir no seu caso, e despois tres meses para emitir ese informe". Asegurou que axilizarán ao máximo a emisión deste informe, confiando en que o PXOM veña "correctamente".
A petición de axustar o proxecto urbanístico, impulsado por Jácome, remóntase a xuño de 2025. Nese momento, a Xunta observou que os parámetros urbanísticos de edificabilidade, aproveitamento e consolidación en núcleos rurais "carecen de toda base documental xustificativa", e esixiu a inclusión do Plan Especial de Desenvolvemento para o Casco Vello de Ourense.
