A creadora de contido María Prado Rúa, orixinaria de Ourense, utilizou as súas redes sociais para facer pública a violenta agresión física que sufriu mentres regresaba á súa casa en Santiago de Compostela na noite do mércores ao xoves. Segundo o seu relato, un home descoñecido abordouna coa intención de arrastrala cara a unha zona escura da vía pública.
A moza describiu o forcexo: "Tentou tirarme pero non o conseguiu. Deume un ostión na cara, pero non me tumbou", explicou, mostrando nas súas redes sociais as feridas e os moratóns resultantes do altercado. O agresor tamén intentou facerse cunha pedra para golpeala, pero Prado Rúa conseguiu impedilo pisándolla. Os seus berros de auxilio alertaron a veciños da zona, quen saíron e lograron escorrentar ao atacante, quen antes de fuxir ameazou de morte aos presentes.
“"O tipo quería coller unha pedra e baterme con ela, menos mal que lla pisei. [...] Eu xa vos digo que non achanto nin pa deus."
A pesar do susto, Prado Rúa manifestou unha profunda impotencia polas limitacións legais do seu caso. Ao non producirse toques íntimos nin ser o agresor a súa parella, a agresión non se catalogou como violencia sexual nin de xénero, o que impediu a súa detención. "Nin o poden deter. Pero que mundo nos queda?", lamentou a influencer.
A pesar da experiencia vivida, a influencer mantense firme e agradeceu a solidariedade veciñal. "Estou ben, quedoume algún arañazo e algún moratón do forcexeo. Prefiro que me tivese pasado a min e non a outra persoa", afirmou. Ademais, recalcou a súa determinación de non cambiar os seus hábitos: "Quero seguir volvendo a miña casa á hora que me salga da cona."
