O evento, coorganizado pola Asociación de Concesionarios de Automóbiles de Ourense (ACAUTO) e coa colaboración da Deputación Provincial, reunirá a 20 concesionarios da provincia que representarán a 28 marcas. Os visitantes poderán acceder a unha oferta de máis de 400 coches de ocasión e segunda man, incluíndo vehículos de quilómetro cero, seminovos e de xerencia, con prezos especiais de feira.

A presentación oficial do Car Outlet Ourense tivo lugar o martes 14 de abril, contando coa presenza de Alicia López, directora territorial da Consellería de Economía e Industria en Ourense; José María Lago, deputado de Medio Ambiente e Enerxía da Deputación Provincial de Ourense; Rogelio Martínez, director xerente de Expourense; e César Fernández Mosquera, vicepresidente de A.C.A.U.T.O.

A organización subliña a importancia deste salón para rexuvenecer o parque automobilístico ourensán, que actualmente conta con 165.000 unidades matriculadas e unha idade media de 18,2 anos, superando a media galega de 16,7 anos. A renovación da frota non só melloraría a seguridade viaria, senón tamén a sustentabilidade, dado que só o 0,67% dos coches da provincia son eléctricos.

Os concesionarios de A.C.A.U.T.O. recomendan aos consumidores acudir a profesionais para a compra de vehículos de segunda man, xa que estes ofrecen garantías legais dun ano, que moitas empresas estenden ata dous anos ou máis para os seminovos (de 1 a 6 anos). Ademais, as marcas están a profesionalizar o mercado de ocasión, ofrecendo garantías similares ás dos coches novos e encargándose da xestión da documentación.

O horario do salón será o venres 17 de abril de 11:00 a 20:30 h, o sábado 18 de 10:00 a 20:30 h e o domingo 19 de 11:00 a 20:00 h. A entrada terá un custo de 3 euros, sendo gratuíta para menores de 12 anos. Tamén se ofrecerá un servizo de ludoteca de balde a partir do venres pola tarde.