A emblemática Plaza Mayor de Ourense foi o punto de partida da trixésima edición do Rally de Ourense de Automóbiles Clásicos e Antigos. A proba, organizada pola Escudería de Automóviles Clásicos de Ourense, congregou a preto de 90 vehículos históricos que completaron un percorrido de case 200 quilómetros ao longo da xornada.

A comitiva atravesou 18 localidades da provincia, con reagrupamentos estratéxicos en puntos como Montederramo, Trives, Castro Caldelas e Xunqueira de Espadanedo. Os participantes gozaron dunha comida de irmandade en Manzaneda, e a xornada culminou cunha cea de confraternidade no Hotel Balneario de Laias, onde se fixo entrega de lembranzas e trofeos.

A competición, dividida en once tramos cronometrados nas modalidades de regularidade e ruta, tivo como gañadores a Miki Caldas e Adolfo González, ao volante dun BMW 320 e21, sumando 187,5 puntos. A segunda posición foi para Fernando Carrera e Antonio Pazo (BMW 325i) con 206 puntos, seguidos por Juan Recimil e Alejandro Barrio (BMW 320 e21) no terceiro posto con 243,5 puntos.

O bo tempo propiciou que numerosos espectadores se achegasen a gozar destes vehículos de época, que circularon por paraxes de gran beleza natural. A organización tamén quixo ter un xesto solidario, deseñando o trazado para que pasase maioritariamente por localidades afectadas polos incendios do ano pasado, como Pereiro de Aguiar, Paderne de Allariz Maceda, Montederramo, Chandexa de Queixa, A Pobra de Trives, Manzaneda, San Xoan de Río, Castro Caldelas, A Teixeira, Parada do Sil, Xunqueira de Espadanedo, Esgos, Nogueira de Ramuín, Toen e Cenlle.