Este proceso está dirixido tanto a individuos sen autorización de residencia e traballo como a solicitantes de protección internacional. Para poder acceder a esta regularización, é imprescindible acreditar a chegada a España antes do 1 de xaneiro de 2026, así como unha permanencia continuada no país de polo menos cinco meses. Ademais, requírese un certificado de antecedentes penais tanto do país de orixe como doutros nos que se residise.
No caso das persoas sen autorización, deberán presentar o formulario EX32 e cumprir, como mínimo, un dos seguintes requisitos: contar con historial laboral ou intención de traballar, acreditar un vínculo familiar ou dispoñer dun certificado de vulnerabilidade. Pola súa banda, os solicitantes de protección internacional terán que presentar o formulario EX31, sen necesidade de xustificar vulnerabilidade.
A regularización permitirá obter documentación e residencia, acceder a dereitos laborais e á Seguridade Social, así como a servizos públicos como a sanidade. Tamén contempla protección para a familia, especialmente no caso de menores.
As solicitudes poderán presentarse de forma telemática, a través da sede electrónica ou da plataforma Mercurio, dispoñible as 24 horas. Tamén se poderá facer de maneira presencial, con cita previa obrigatoria, en rexistros habilitados, oficinas da Seguridade Social ou Correos (solicitude a través da web ou do teléfono 060).
En Ourense, os trámites específicos poderán realizarse nos servizos sociais municipais, na Subdelegación do Goberno, na Tesouraría da Seguridade Social e nas oficinas de Correos. Ademais, contarán coa colaboración de entidades como Xarela Formación-animación ou o Centro de Desenvolvemento Rural O Viso, que ofrecerán apoio no proceso.
Este proceso de regularización en España súmase a iniciativas anteriores, como as de 1986, 1991, 2000, 2001 e 2005. Enmárcase nunha tendencia europea, con máis de 40 procesos similares levados a cabo desde os anos 90, incluíndo os realizados en Italia (2020) e Portugal (2021).
