O sindicato lembrou que xa en xullo de 2025 denunciou ante a Inspección de Traballo as condicións de "estrés térmico" que sofre o persoal, tanto na maioría dos centros de saúde que "non teñen climatización", como nas zonas asistenciais do CHUO, que "tampouco a teñen".
Comisións Obreiras subliñou que a normativa estatal obriga as empresas a adaptar as condicións de traballo cando se activen avisos por temperaturas elevadas de nivel laranxa ou vermello por parte da Aemet, co obxectivo de garantir a protección dos traballadores. A dirección da Área Sanitaria non pode escudarse en que non estaba preparada, xa que as delegadas de Prevención de CC.OO. xa advertiran nos últimos anos de que este "era un problema recorrente cada verán".
A Inspección de Traballo requiriu ao Sergas a adoptar medidas preventivas, pero CC.OO. lamenta que a maioría dos centros de saúde e das zonas de consultas ou unidades de hospitalización continúan sen climatización.
Segundo o sindicato, esta situación provoca que nas zonas de traballo se superen os 30 graos, xerando mareos, dores de cabeza e malestar xeral tanto no persoal como nas persoas usuarias. Critican que a "propaganda" da Consellería de Sanidade sobre os orzamentos para paliar a calor "non se reflicte na realidade diaria".
A organización sindical considera que a xerencia da Área Sanitaria mantén unha actitude "reiterada de desprezo" cara aos delegados de Prevención e de "inacción" ante as condicións climáticas "extremas e adversas" da provincia de Ourense.
“"Esiximos solucións xa, antes de lamentar accidentes laborais ou enfermidades laborais por esta causa"
O Servizo Galego de Saúde (Sergas) defendeu que "a maior parte" dos espazos hospitalarios da área sanitaria de Ourense, Verín e O Barco de Valdeorras están climatizados. Fontes do Sergas explicaron que se están a levar a cabo distintas actuacións para "mellorar as condicións ambientais e o confort térmico", como a posta en marcha progresiva dun novo sistema de climatización no Hospital Médico Cirúrxico de Conxo, cun investimento da Xunta de máis de 1,3 millóns de euros.
No que respecta á área sanitaria ourensá, o Sergas afirmou que "a maior parte" dos espazos hospitalarios están climatizados, "agás en zonas moi puntuais". Asegurou tamén que os centros de saúde de nova construción contan con sistemas "eficientes", o que demostra o "compromiso progresivo" do Goberno galego. Mencionaron o edificio Santa María Nai como exemplo climatizado e a instalación de aparellos portátiles nas plantas con actividade asistencial do Edificio de Cristal.
A Consellería de Sanidade sinalou que este ano a Xunta impulsa obras de mellora da climatización en distintos centros de saúde, priorizadas na provincia de Ourense, aos que se destinará 1 millón de euros.
