A querela, presentada por un exconcelleiro de Democracia Ourensana, cuestionaba a suposta compra de material técnico con fondos municipais para a televisión privada Auria TV, propiedade do alcalde, e a contratación dun asesor encargado de realizar gravacións para a mesma. O xuíz, porén, non atopou indicios de delito.

O maxistrado subliña que a adquisición de material técnico, incluíndo dúas cámaras por 8.698,04 euros en xuño de 2020, pode ter un interese lexítimo para a cidadanía, máis alá do seu posible uso en Auria TV. Segundo o xuíz, “é totalmente razoable que o Concello adquira material para gravar actos de interese para os ourensáns, tendo en conta a importancia das redes sociais”.

En canto ao asesor municipal, o xuíz indica que non se demostrou que traballase para Auria TV. Desde 2019, as súas funcións son exclusivamente para o Concello, incluíndo a realización de gravacións institucionais, o que non contravén o dereito penal. A resolución aínda non é firme, xa que permite a apelación ante a Audiencia Provincial.