O xogador do Atlético Arnoia, Álex Veloso, un dos máis empregados por Manel Vázquez, subliña o gran rendemento do conxunto nesta campaña. O vigués, afincado en Ribadavia dende os catro anos, expresou a súa satisfacción co club, onde milita dende 2021, e coa confianza depositada nel polo adestrador.
“"Dende que chegou, Manel sempre confiou moito en min e eu no campo só intento devolverlle esa confianza facendo o meu traballo o mellor posible. A verdade é que estou súper contento aquí, intento aproveitar os minutos que me dá e xogo onde me poña."
Veloso, que se desenvolveu nas categorías base do Ourense CF, recoñece que se sente máis cómodo xogando de lateral debido ao seu perfil defensivo, aínda que esta tempada tamén actuou no centro do campo. A súa intensidade e bo desempeño nas disputas son as súas principais virtudes no terreo de xogo.
O equipo arnoiés, que vén de gañar 1-2 ao Beluso, atópase empatado a puntos coa zona de play off. A pesar de ser o mellor equipo a domicilio, o Arnoia está a ter dificultades para manter a regularidade nos partidos disputados en A Queixeira, unha situación que contrasta coas tempadas anteriores.
“"Non lle atopo unha explicación, aínda que é certo que cada tempada é diferente. O ano pasado eramos o equipo menos goleado da liga e custábanos un mundo facer goles, en cambio, este curso é todo o contrario, sobre todo en casa, porque a domicilio levamos sete porterías a cero."
O vindeiro encontro do Arnoia será un derbi crucial contra o Celanova o domingo ás 18:00 horas en A Queixeira. Veloso anticipa un partido complicado, xa que o Celanova tamén se xoga moito, e destaca a importancia deste enfrontamento para as aspiracións do seu equipo de acadar o play off.
