A campaña 'Veráns de Lecer Consumo', promovida pola Consellería de Emprego, Comercio e Emigración da Xunta de Galicia, intensificará a súa presenza en Galicia durante o que resta do mes de agosto. O programa, que xa chegou a 5.800 persoas de 91 concellos con máis de 255 actividades, ten como obxectivo fomentar hábitos de consumo responsable entre a infancia e a mocidade a través de propostas educativas e de lecer gratuítas.
As actividades están adaptadas a diferentes idades e céntranse en temas como os dereitos das persoas consumidoras e usuarias, a publicidade ou o consumo na rede. Entre as propostas atópanse 'Xogueteando: un lecer diferente' (para nenos de 3 a 6 anos), 'A xincana do consumo responsable' (para rapaces de 7 a 12 anos), 'Publicistas por un día' e actividades sobre consumo dixital.
A iniciativa busca formar persoas consumidoras conscientes, solidarias e responsables, coñecedoras dos seus dereitos. Ata finais de agosto, a campaña visitará municipios como Culleredo, Carral, Ferrol, Sobrado, Coirós e Teo na provincia da Coruña; Guitiriz, A Pobra do Brollón, Cervo, Quiroga, Pantón, Viveiro e Barreiros en Lugo; Amoeiro, A Peroxa, Vilamarín, Esgos, Petín, Maside e Sandiás en Ourense; e Agolada, Silleda, Ponte Caldelas, O Porriño, O Rosal, Sanxenxo e Ponteareas en Pontevedra.
Esta campaña complétase coa labor da Escola Galega do Consumo, que no primeiro semestre do ano chegou a preto de 16.300 persoas con programas educativos sobre consumo responsable, incluíndo iniciativas como CORES, programas estacionais, Consumo Accesible, Consumo Sénior e sesións divulgativas.
