O vindeiro luns, 28 de setembro, o Concello de Guitiriz abrirá o prazo de inscrición para participar no Taller de Estimulación Cognitiva e da Memoria. Esta actividade está deseñada para traballar e reforzar diferentes capacidades cognitivas a través de exercicios e dinámicas prácticas e amenas.
As sesións centrarase en aspectos como a atención, a concentración, a memoria, a lóxica e a ximnasia cerebral. As actividades buscan estimular as capacidades cognitivas e favorecer o seu mantemento ao longo do tempo.
O obradoiro contará con dous grupos. Un deles terá lugar en Guitiriz, coas sesións os venres ás 11:30 horas na Escola Habanera, a partir do venres 16 de outubro. O segundo grupo desenvolverase en Parga, os xoves ás 11:00 horas na Escola das Nenas, co inicio previsto para o xoves 15 de outubro.
O prazo para formalizar as inscricións estará aberto ata o 9 de outubro ou ata que se complete o aforo. As persoas interesadas poderán inscribirse presencialmente no Concello de Guitiriz ou a través da sede electrónica municipal. O modelo de solicitude está dispoñible para a súa descarga na ligazón correspondente.
