A solicitude da Fiscalía de nove anos de inhabilitación para o alcalde de Ourense, por un presunto delito de prevaricación, xerou unha reacción en cadea entre os grupos da oposición municipal. PSOE, PP e BNG coincidiron en amosar a súa preocupación pola situación xudicial do rexedor, esixindo explicacións públicas e celeridade á Xustiza para evitar que a parálise e a polémica sigan marcando o día a día da cidade.
A voceira municipal do PP, Ana Méndez, mostrou o seu absoluto respecto á Xustiza, pero esixiu "explicacións públicas". "O grave é que Gonzalo Jácome segue sen dar a cara e sen explicarlle á cidadanía unha situación tan seria coma esta", sinalou. Méndez lembrou ademais que o alcalde non presentou a súa declaración de bens nos últimos sete anos e lamentou a deriva do Concello, indicando que "o alcalde sempre está no centro da polémica por cuestións relacionadas coa súa actuación persoal e institucional".
Desde as filas socialistas, a voceira María Fernández Ojea, cualificou a situación de "moi grave, gravísima". Engadiu que "calquera político ao uso non sei se dimitiría pero polo menos pensaría en dar explicacións públicas e en dimitir por ética e estética". Para os socialistas, o problema de fondo é que "hai moito tempo que Ourense vive instalada no ruído, na polémica e nunha parálise que necesitamos que remate".
Pola súa banda, o voceiro do BNG e candidato á alcaldía, Luis Seara, apuntou que "tratándose do alcalde deste Concello e dun presumible candidato ás municipais, esta cuestión debería resolverse coa maior brevidade e coa maior celeridade posible". O líder nacionalista afirmou que a súa formación se centrará en "traballar exclusivamente naquilo que depende de nós".
