A competición, organizada pola Sociedade Canina Galega e autorizada pola Federación Cinolóxica Internacional (FCI) e a Real Sociedade Canina de España (RSCE), celebrarase por terceira edición consecutiva e contará coa participación do veciño de Cerdido Juan Gomariz, recoñecido a nivel estatal.
O alcalde de Cerdido, Alberto Rey, destacou a consolidación do evento e o seu impulso para a localidade. "É unha enorme satisfacción que Cerdido acolla por terceira edición un evento de ámbito nacional coma este, o que demostra o éxito das anteriores convocatorias, consolida o noso concello no mapa das grandes citas cinolóxicas e volverá atraer a numerosos participantes e visitantes ao longo de toda a xornada", sinalou o rexedor.
Para participar, é imprescindible formalizar a inscrición completa e cumprir cos requisitos administrativos e veterinarios da RSCE. Os exemplares de razas potencialmente perigosas en Galicia deberán remitir documentación específica á organización antes do 27 de novembro.
O certame conta co patrocinio de Arion e a colaboración do Concello de Cerdido e do Xeoparque Cabo Ortegal. O goberno local anima á veciñanza a achegarse a A Barqueira para gozar da xornada.
As persoas interesadas en consultar as bases ou tramitar a inscrición poden facelo na web www.caninagalega.com ou no teléfono 986 377 305.
