O presidente da Xunta, Alfonso Rueda, informou hoxe de que o Goberno autonómico prevé publicar antes de que remate o ano a nova normativa de desenvolvemento do decreto de FP, aprobado este ano, para actualizar os currículos destas ensinanzas e incorporar tres novas figuras docentes. Así se recolle nos informes da Consellería de Educación, Ciencia, Universidades e FP analizados hoxe polo Consello da Xunta.
A nova normativa afecta un total de 206 titulacións das 26 familias profesionais implantadas en Galicia en máis de 270 centros, coa participación de máis de 4.800 docentes e 75.383 alumnos. Recolle novos módulos e figuras docentes, investigación e innovación aplicada, planificación da actividade docente, organización académica, formación práctica na empresa e prevención de riscos laborais, ademais de novas metodoloxías activas.
O desenvolvemento normativo faise a través de catro ordes (unha para cada grao e outra para cursos de especialización e másteres), que configuran un modelo formativo máis flexible e permiten actualizar os currículos con maior axilidade. Refórzase a autonomía dos centros para adaptar o currículo ás necesidades da contorna, incluíndo módulos como Habilidades comunicativas en lingua estranxeira e Afondamento nas competencias profesionais.
Introducíronse tres novas figuras docentes para achegar a FP á realidade das empresas: persoal experto do sector produtivo con prestixio profesional, profesionais con dominio específico no seu sector e expertos sénior de empresa en xubilación parcial ou redución de xornada. Estas figuras poderán impartir clases, apoiar accións de investigación e innovación, e garantir a actualización curricular.
Créase o selo Empresa comprometida coa FP dual, dirixido a compañías que colaboraron con estas ensinanzas polo menos durante tres anos consecutivos. As empresas recoñecidas terán beneficios como simplificación de trámites administrativos, prioridade na acreditación da experiencia laboral e acceso preferente a proxectos de innovación. O persoal destas empresas terá prioridade para incorporarse como profesorado experto.
O obxectivo deste recoñecemento, que terá unha vixencia de catro anos e se convocará anualmente, é fortalecer os vínculos entre a FP e o tecido produtivo, favorecer a participación das empresas nos proxectos innovadores e a formación continua.
