Entre as beneficiarias, Aluminios Cortizo, con sede en Padrón, destaca cunha proposta de subvención de case 7,8 millóns de euros. Estes fondos destinaranse á modernización do seu proceso de foliado industrial, incorporando tecnoloxías dixitais, automatizadas e robotizadas na súa planta central.

Na mesma localidade de Padrón, a empresa de cerraxes STAC tamén obtén unha axuda significativa de 2,09 millóns de euros. O seu proxecto céntrase na implementación dun sistema avanzado de almacenamento automático, baseado en robotización, intelixencia artificial e deep learning.

Pola súa banda, Exlabesa, con presenza na área de Santiago, consegue outros 2 millóns de euros, distribuídos entre as súas plantas de Rois e Valga. En Rois, Exlabesa Extrusion recibirá case 600.000 euros para a recuperación avanzada de aluminio a partir de escorias, mentres que Exlabesa Building Systems obtén case 1,57 millóns para un sistema de almacenamento robotizado que reducirá os residuos por mermas no proceso.

Outras empresas galegas tamén figuran na lista de beneficiarias. Megatech Industries, de Ourense, recibirá 800.000 euros para investigación industrial. Hijos de Rivera, da Coruña, obtén 937.581 euros para implementar ferramentas de intelixencia artificial e supercomputación. En Lugo, Cidega Inox contará con 67.000 euros para tecnoloxías innovadoras en curvado e lixado, e unha empresa en Bergondo (A Coruña) recibirá 227.500 euros para un proxecto de transformación dixital sostible.