A cerimonia, celebrada o pasado 14 de abril no auditorio municipal, contou coa presenza dos rexedores de Dodro e Pontecesures, e serviu para consolidar este evento que xa alcanza a súa terceira edición. Durante o acto, entregouse unha placa conmemorativa aos familiares de Manuel Agrasar e interpretáronse cancións emblemáticas.
“"Un home que se erixiu en defensa dos valores democráticos da República con valor. Un home que afrontou unha vida difícil nun contexto represivo extraordinario. Como alcalde, como representante dunha administración pública deste Estado que durante 40 anos viviu baixo o xugo da ditadura franquista, quero pedir perdón en nome do Concello de Padrón, en nome das institucións públicas que compoñen este Estado, polo sufrimento causado a Manuel Agrasar e á súa familia. Un perdón que chega tarde. Moi tarde. Pero que non por iso deixa de ser necesario."
Manuel Agrasar Cajaraville, alcumado 'Barbarroxa', foi un mariñeiro voluntario que se integrou na V Agrupación do Exército Guerrilleiro de Galicia, liderada por Benigno Andrade Foucellas. Foi asasinado en Luou, no concello de Teo, durante a represión franquista. A súa figura foi rescatada grazas ao traballo de investigación de Lucía Santiago Sanmiguel, do Grupo Histagra USC, quen tamén interveu no tributo.
O alcalde de Padrón subliñou a importancia de que o Día da Memoria Democrática se "consolide porque Padrón necesitaba espazos para deixar constancia de aquilo que durante moitas décadas permaneceu silenciado polo medo". Ademais da entrega da placa, o evento contou coa participación de representantes da Comisión pola Recuperación da Memoria Histórica do Barbanza. A música tivo un papel destacado, con Fernando Briones e David Ferreiro interpretando pezas como Para la libertad de Joan Manuel Serrat, Al alba de Luis Eduardo Aute, e Libertad sin ira de Jarcha.
