A repotenciación do parque eólico Monte Treito, promovida por Iberdrola Renovables Galicia, sométese a información pública. O proxecto prevé a substitución dos 40 aeroxeradores actuais por sete novas máquinas, cunha potencia conxunta de 31,5 megawatts (MW), mantendo a potencia máxima de evacuación autorizada desde 2001.
Esta renovación tecnolóxica integral busca optimizar a instalación, que leva operativa máis de dúas décadas. A pesar da redución no número de máquinas, a potencia total evacuable non se verá modificada.
O investimento previsto para esta actuación ascende a case 34 millóns de euros, cun prazo de execución estimado de nove meses. A intervención inclúe o desmantelamento das infraestruturas actuais, como os 40 aeroxeradores, centros de transformación, cimentacións e canalizacións eléctricas, así como a restauración ambiental dos terreos afectados.
Ademais, adaptaranse os camiños que deixen de ser necesarios e a subestación eléctrica existente para cumprir coas novas condicións técnicas e de funcionamento derivadas da configuración renovada do parque.
