A delegada da Xunta na Coruña, Belén do Campo, xunto co alcalde da localidade, Ramón Tojo, asistiu esta mañá aos espectáculos “Ser diferente mola”, do ilusionista Jorge Lorenzo García, e “Comisión de festas”, de Brais das Hortas, incluídos na programación da 14ª edición de Cultura no Camiño.
A proposta de maxia e humor “Ser diferente mola” dirixiuse ao público familiar, transmitindo unha mensaxe positiva sobre a diversidade e o respecto ás diferenzas. O espectáculo “Comisión de Festas” transformou o escenario nun campo da festa con música, baile e risa.
Estes eventos tiveron lugar no CEIP O Pumar en Urdilde e no CPI Dos Dices de Rois, como parte da aposta da Xunta de Galicia por promover actividades culturais que fomenten o lecer de calidade e a educación en valores.
O circuíto 'Cultura no Camiño' deste ano ofrecerá 316 espectáculos e concertos a cargo de 147 formacións artísticas en 87 concellos galegos das rutas xacobeas, cun investimento conxunto de máis de 530.000 euros entre a Xunta e os concellos participantes.
O programa, que se desenvolve desde o 16 de xuño ao 31 de agosto, busca dinamizar a oferta cultural nos municipios das rutas xacobeas e favorecer a contratación de espectáculos galegos, cofinanciado pola Axencia Galega das Industrias Culturais.
