O programa, que contará con 50 prazas gratuítas, desenvolverase do 1 de xullo ao 14 de agosto, de luns a venres, en horario de 9.00 a 14.00 horas. A base das actividades será a Escola Municipal de Música de Vilagarcía, situada na avenida Rosalía de Castro.

As familias interesadas poderán presentar as súas solicitudes entre o 13 e o 21 de maio. Recoméndase a vía telemática a través da sede electrónica municipal, aínda que tamén se poderá formalizar o trámite no Rexistro Xeral do Concello.

Naturarte combinará actividades lúdicas con propostas educativas e ambientais. Os participantes realizarán saídas para coñecer o seu contorno natural e social, co obxectivo de fomentar a educación medioambiental e o contacto co territorio. Ademais do compoñente formativo, o programa busca facilitar a conciliación familiar durante as vacacións escolares de verán. Un dos criterios principais de baremación será que ambos os proxenitores estean traballando ou participando en actividades formativas reguladas durante o horario dos campamentos.

Para optar a unha praza, os menores deberán nacer entre o 1 de xaneiro de 2016 e o 31 de decembro de 2019 e estar empadroados en Vilagarcía de Arousa. Non obstante, tamén poderán acceder nenos non empadroados se acreditan que algún dos seus proxenitores desenvolve a súa actividade laboral no municipio. As familias poderán solicitar a participación para o período completo ou por quincenas, adaptándose ás necesidades de cada unidade familiar.

O formulario de inscrición está dispoñible para descarga na sede electrónica e na web municipal, ademais de poder recollerse nas oficinas municipais de Xuventude ou Servizos Sociais, onde tamén se atopan as bases completas da convocatoria e a documentación requirida. A lista provisional de admitidos publicarase o 9 de xuño, abrindo un prazo de dez días para subsanar documentación. A lista definitiva darase a coñecer o 25 de xuño. En caso de superar a demanda, elaborarase unha lista de espera segundo a puntuación obtida no proceso de baremación.