Este proxecto, que se desenvolverá nunha parcela cedida gratuitamente polo Concello, representa un investimento de 1.983.380,16 euros. A execución das obras seguirá o proxecto elaborado pola UTE Oxil-Domohomo, que tamén se encargará da dirección facultativa.

A promoción será financiada na súa totalidade con recursos autonómicos, sen achegas estatais nin fondos europeos. O edificio, que se levantará sobre unha superficie de 675 metros cadrados, contará con planta baixa e dúas alturas, integrándose na contorna residencial de baixa densidade, caracterizada principalmente por vivendas unifamiliares.

O inmoble disporá de oito vivendas de dous dormitorios, unha delas adaptada para persoas con mobilidade reducida, e dúas vivendas de tres dormitorios. Todas as unidades incluirán praza de garaxe e trasteiro.

Esta actuación enmárcase na estratexia do Executivo galego para duplicar o parque público de vivenda, co obxectivo de alcanzar as 8.000 unidades antes de 2028 e chegar ás 10.000 en 2030. Actualmente, unhas 4.000 vivendas de promoción pública atópanse en diversas fases de execución en toda Galicia.