O encontro, que se celebra hoxe e mañá, conecta profesionais dos sectores pesqueiro e turístico, representantes dos GALP e entidades europeas co obxectivo de compartir experiencias e abordar os retos dun sector en transformación.
A regulación do pescaturismo e a continuidade dos Grupos de Acción Local do Sector Pesqueiro (GALP) no próximo marco financeiro foron puntos clave na inauguración. A presidenta do GALP Ría de Pontevedra, María del Carmen Vázquez Nores, destacou a diversidade de procedencias como unha oportunidade para buscar respostas comúns.
Manuel Pablos López, da Subdirección General de Sostenibilidad Económica y Asuntos Sociales do Ministerio de Agricultura, Pesca y Alimentación, subliñou o papel dos GALP no impulso da economía azul e abriu a porta a revisar a normativa do pescaturismo.
O alcalde de Sanxenxo, Telmo Martín, sinalou o crecente interese dos visitantes polo pescaturismo e o turismo mariñeiro como forma de achegarse á tradición e identidade da costa galega.
A conselleira do Mar, Marta Villaverde Acuña, pechou as intervencións inaugurais reivindicando a conexión entre os GALP e o sector pesqueiro para promover proxectos innovadores e crear oportunidades nos territorios costeiros.
O congreso continuará abordando o marco normativo, experiencias europeas e o papel das confrarías, así como a promoción e cooperación entre territorios. Mañá haberá unha mostra de proxectos e visitas a experiencias de pescaturismo.
O encontro enmárcase no proxecto de cooperación Mar e Rías, no que colaboran os oito GALP de Galicia para impulsar o pescaturismo e o turismo mariñeiro, favorecendo o intercambio de coñecementos e o desenvolvemento das comunidades costeiras.
