O Goberno galego prevé investir 1,5 millóns de euros na construción dun novo centro de saúde en Meis, que será licitado o vindeiro ano. O director xeral de Atención Primaria e Comunitaria do Servizo Galego de Saúde, Salvador Mariño-Ageitos, detallou na Comisión 5ª do Parlamento os avances na tramitación desta infraestrutura sanitaria.
O proxecto básico do novo centro de saúde atópase actualmente en proceso de supervisión pola oficina de Obras do Sergas e a previsión é aprobalo durante este mes de outubro. Posteriormente, solicitarase a correspondente licenza municipal. Unha vez completados estes pasos, o Goberno galego espera ter o proxecto de execución aprobado e a documentación necesaria para iniciar a licitación das obras ao longo do primeiro trimestre de 2027.
Salvador Mariño-Ageitos resaltou o traballo coordinado entre os equipos técnicos do Servizo Galego de Saúde, a área sanitaria de Pontevedra e o equipo redactor para adaptar o deseño ás necesidades asistencias. Tamén indicou que o Concello foi informado de todo o proceso e das adaptacións de prazos para garantir a calidade e funcionalidade da infraestrutura.
O novo centro de saúde de Meis, incluído no Plan de Infraestruturas Sanitarias de Atención Primaria da Xunta, concentrará a atención sanitaria nun único espazo de 1.037 m², substituíndo as actuais dependencias de Mosteiro e San Martiño.
A nova infraestrutura contará con dous andares. O primeiro albergará a zona de recepción, unha sala polivalente, dúas consultas de medicina de familia e dúas de enfermería, ademais dunha consulta pediátrica e sala de lactación. No segundo andar haberá unha consulta médica e outra de enfermería, a área da muller cunha consulta de matrona e aula de educación para a saúde, unha sala de xuntas e unha biblioteca para o persoal.
No marco do Plan de reforma da atención primaria (2026-2030), a Xunta investirá 320 millóns de euros, que inclúen a incorporación de 644 novos profesionais, a renovación de centros de saúde por máis de 220 millóns, a adquisición de novo equipamento e a dotación de sistemas tecnolóxicos avanzados.
