A feira, que conta co apoio da Axencia Turismo de Galicia, celebrará a súa recoñecida Bolsa de Contratación, unha ferramenta clave para que a oferta turística galega incorpore os seus produtos a catálogos nacionais e internacionais. Nesta edición, o número de países representados polos turoperadores aumenta de dez a trece.

Confirmáronse máis de 30 turoperadores con presenza en mercados como Alemaña, Brasil, EE.UU, España, Irlanda, Finlandia, Indonesia, Italia, México, Portugal, Polonia, Reino Unido e Suíza. Estes axentes, maioritariamente axencias tradicionais ou de receptivo especializadas en España e Portugal, buscan propostas diversas, dende turismo gastronómico ata o sostible, educativo, de natureza e, de forma salientable, turismo relixioso e o Camiño de Santiago, tendo en conta a proximidade do Xacobeo 2027.

Os operadores terán a oportunidade de coñecer a oferta de empresas e destinos turísticos, na súa maioría galegos, e poderán presentar as súas propostas a profesionais con capacidade real de comercialización. Isto facilitará acordos e mellorará o coñecemento das demandas de cada mercado para adaptar a oferta e aumentar a competitividade.

As reunións axendadas, centradas nos intereses mutuos, terán lugar o 4 de xuño (todo o día) e a mañá do 5 de xuño, coincidindo co primeiro día e medio do certame, que se celebrará xunto á Feira Internacional Abanca Semana Verde de Galicia.

Ademais das mesas de negocio, a maioría dos turoperadores participarán nunha viaxe de familiarización. Esta incluirá visitas a lugares emblemáticos como o Pazo do Faramello en Rois (venres 5 de xuño), Cambados (sábado 6 de xuño) con paradas no Pazo de Fefiñás & Gil de Armada e o xardín da Fundación Manolo Paz, a adega Terras de Asorei en Meis, e o Pazo Quinteiro da Cruz en Ribadumia. O domingo 7 de xuño, o grupo visitará Santiago de Compostela e a súa catedral.