O centro arousán, que iniciou a súa actividade a finais do ano 2000, consolidouse como un piar fundamental da Sanidade Pública na bisbarra. A Xunta conmemora esta efeméride, poñendo en valor a evolución dun hospital que se caracterizou pola súa capacidade de adaptación ás necesidades da poboación das súas localidades de referencia.

Situado en Ande-Rubiáns, este hospital naceu co obxectivo de prestar asistencia sanitaria pública integral a unha poboación de arredor dos 75.000 habitantes pertencentes aos concellos de Cambados, Catoira, A Illa de Arousa, Ribadumia, Vilanova de Arousa e Vilagarcía de Arousa.

A súa posta en marcha culminou en setembro de 2000 coa apertura das consultas externas e do bloque cirúrxico, seguida pola hospitalización en agosto de 2001 e a posta en marcha do servizo de Urxencias e da hospitalización de adultos ese mesmo ano. Inicialmente, o hospital contaba cunha infraestrutura de máis de 12.000 metros cadrados, 84 camas, tres quirófanos e unha área de urxencias con dez boxes.

Na actualidade, o Hospital do Salnés conta cun cadro de persoal de 496 efectivos, fronte aos 187 profesionais cos que iniciou a súa andaina. Ao longo destes anos, o centro experimentou unha constante evolución marcada pola ampliación das súas infraestruturas e a mellora dos seus recursos asistenciais.

Un proxecto estratéxico de ampliación impulsado en 2011 permitiu incrementar a súa capacidade cirúrxica e adaptar os espazos, pasando a dispoñer de 130 camas e 6 quirófanos. Posteriormente, en 2017, activáronse as unidades de Coidados Postcirúrxicos e Cirurxía Maior Ambulatoria, e en agosto de 2023 renovouse a área de Esterilización e as dependencias da base medicalizada do 061.