O Concello de Vilanova de Arousa mantén abertas dúas prazas para participar en sendos cursos de formación gratuítos impulsados polo Centro de Desenvolvemento Local no Pazo de Vista Real. As accións formativas, que xa comezaron hai unha semana, permiten de maneira excepcional a incorporación de dous novos alumnos nos próximos días.
A oferta inclúe unha praza para o curso de Seguridade informática e outra para Instalación e mantemento de xardíns e zonas verdes, dúas especialidades con elevada taxa de inserción laboral en anteriores edicións e que incorporan ademais prácticas en empresas da comarca.
O curso de Seguridade Informática ten unha duración de 518 horas e desenvólvese de luns a venres en horario de 9.00 a 14.00 horas ata o próximo 19 de outubro. O programa inclúe contidos relacionados coa protección de equipos informáticos, auditorías de seguridade, xestión de incidentes, sistemas seguros de acceso e transmisión de datos, así como administración de servizos informáticos.
Pola súa banda, a formación en Instalación e Mantemento de Xardíns e Zonas Verdes suma 548 horas lectivas e finalizará o 8 de outubro. Entre as materias que se impartirán destacan a preparación do terreo de cultivo, mantemento e mellora de xardíns e zonas verdes, control fitosanitario e avaliación do estado sanitario de plantas e infraestruturas vexetais.
Ambos os cursos contemplan 80 horas de prácticas en empresas vinculadas a cada especialidade e ofrecen a posibilidade de acceder a axudas económicas por desprazamento ou conciliación de ata 300 euros.
As accións formativas están dirixidas a persoas desempregadas inscritas no Servizo Público de Emprego, traballadores autónomos e empregados por conta allea con horarios compatibles. Para acceder é necesario contar, polo menos, co título de Bacharelato, un ciclo medio de FP ou a proba de acceso para maiores de 25 anos.
Ademais da formación técnica específica, o alumnado recibirá contidos relacionados con prevención de riscos laborais, inserción laboral, sensibilización ambiental e igualdade de xénero.
As persoas interesadas poden formalizar a súa inscrición enviando os seus datos persoais, o nome do curso elixido e un teléfono de contacto ao correo electrónico javier.pineiro@vilanovadearousa.gal.
