A actividade, que forma parte do programa Voando nas Rías Baixas, tiña previsto o seu desenvolvemento o vindeiro 21 de xuño na praia da Lanzada, situada entre os municipios de O Grove e Sanxenxo. A iniciativa, levada a cabo en colaboración con SEO/BirdLife, busca divulgar o patrimonio natural da provincia e concienciar sobre a conservación dos ecosistemas litorais.

O percorrido centrarase nun dos últimos refuxios da píllara das dunas, unha especie protexida en perigo de extinción. Os participantes, que deberán manter unha distancia de seguridade, poderán observar os niños balizados e as crías desta pequena ave a través de prismáticos e telescopios terrestres.

Dúas guías especializadas de SEO/BirdLife ofrecerán explicacións sobre a especie, as ameazas que sofre e as medidas de protección implementadas na Lanzada cada tempada. A ruta inclúe desprazamento en autobús e o uso de prismáticos e telescopios de alta gama.

O programa Voando nas Rías Baixas continuará despois do verán con novas propostas en lugares como Cabo Udra, o esteiro do Miño en A Guarda, a desembocadura do río Lérez e o Complexo Intermareal Umia-O Grove, que pechará a edición en decembro.