A Garda Civil mantén aberta a investigación para localizar ao condutor que presuntamente se deu á fuga tras atropelar mortalmente a un home de 68 anos na parroquia de Tremoedo, en Vilanova de Arousa. Segundo fontes da investigación, xa se dispoñen de "pistas adecuadas" para dar co seu paradoiro.

O subdelegado do Goberno na provincia de Pontevedra, Abel Losada, lamentou o "fin de semana negro" nas estradas da provincia, que rexistrou dous atropelos mortais, un en Sanxenxo e outro en Vilanova. O suceso de Vilanova tivo lugar sobre as 04:00 horas da madrugada do pasado sábado na estrada PO-530, no contexto dunhas festas populares.

A vítima, un home de 68 anos, quedou tendido no medio da vía. A pesar dos esforzos dos sanitarios desprazados ao lugar, non puideron facer nada por salvarlle a vida. A voz de alarma deuna un particular que alertou de que o vehículo implicado continuara a súa marcha.

Ao lugar dos feitos desprazáronse efectivos de Urxencias Sanitarias de Galicia-061, axentes da Garda Civil de Tráfico e o Servizo de Emerxencias do Concello de Cambados.