O corte de tráfico na OU-406, no paso inferior baixo a vía do ferrocarril en Ribadavia, foi decidido pola Xunta de Galicia despois de que un camión con guindastre quedase encallado por exceso de gálibo. A estrutura, de titularidade do ADIF, sufriu danos nunha das súas vigas de formigón, segundo a comprobación do Administrador ferroviario.
Persoal da Axencia Galega de Infraestruturas e da empresa encargada da conservación da estrada desprazouse ao lugar. En coordinación coa Policía Local de Ribadavia, procederase por seguridade ao corte da circulación entre os puntos quilométricos 0+380 e 0+480.
A empresa conservadora desprazouse para sinalizar convenientemente o corte. A Xunta está a actuar en coordinación co ADIF e o Concello de Ribadavia. Habilitáronse zonas para que os vehículos poidan dar a volta en ambos sentidos de circulación. Os que saian na saída 252 da autovía A-52 en dirección a Ribadavia centro, deberán desviarse pola N-120 na Quinza.
O corte manterase ata que o ADIF realice a avaliación definitiva dos danos e a súa posterior reparación.
