Inspirado no inflúente informe Os límites do crecemento (1972), o proxecto COLAPSO analiza o modelo económico actual e a súa incompatibilidade coa sustentabilidade do planeta. A peza escénica, que se presentará na 42ª edición da MIT de Ribadavia, investiga o significado de ser xove no contexto actual e como esta xeración se enfronta a un mundo marcado pola crise ecolóxica e ecosocial.

O proxecto aborda cuestións fundamentais como os límites do crecemento material e económico, a noción de progreso e a conexión da mocidade co futuro do planeta. A iniciativa concíbese como un laboratorio gratuíto de artes vivas e creación colectiva, dirixido a mozos e mozas de entre 16 e 21 anos.

Desenvolverase en Ribadavia ao longo de dez sesións de traballo, do 7 ao 18 de xullo, culminando cunha peza común aberta ao público o sábado 18 de xullo no Auditorio da Casa da Cultura. Tras a representación, haberá unha conversa co público para fomentar o diálogo interxeracional sobre temas urxentes.

Esta proposta comunitaria, dirixida por Juan Ayala e Miguel Oyarzun, busca dar protagonismo á mocidade para reflexionar colectivamente sobre o futuro do planeta. Como antesala, o martes 26 de maio celebraranse dúas sesións informativas abertas no Museo Etnolóxico de Ribadavia, ás 18.00 h e ás 20.00 h, facilitadas por membros da compañía.

As inscricións para participar no proxecto xa están abertas a través do formulario na web e redes da Mostra. Ademais, a compañía visitará as aulas do IES O Ribeiro para achegar o proxecto á comunidade educativa.