Un operario dunha empresa allea á Escola Naval Militar de Marín perdeu a vida este mércores ao envorcar o camión que conducía nas obras que se desenvolven na zona. O sinistro produciuse ao redor das 10.00 horas.
A voz de alarma deuna un particular ao 112 Galicia, quen alertou de que o condutor do vehículo podería estar xa falecido. O centro de emerxencias mobilizou de inmediato ao Servizo de Urxencias Sanitarias de Galicia-061, aos Bombeiros do Morrazo, á Policía Nacional e á Garda Civil.
A pesar dos esforzos realizados polos equipos de emerxencia desprazados ao lugar, unicamente puideron certificar o falecemento do traballador. Actualmente, os medios traballan na zona para proceder á liberación do corpo, que quedou atrapado tras o aparatoso envorco do camión.
