A Consellería do Mar, a través de Portos de Galicia, está a investir 975.000 euros nas obras de rehabilitación do peirao mexilloeiro da Mosqueira, no municipio pontevedrés de Moaña. A presidenta do ente público, Natalia Botana, comprobou o desenvolvemento dos traballos, que se executan ata final de ano.
Esta actuación complexa, que requiriu varias licitacións e modificacións, case triplicou o orzamento inicial. Reconstruirase o paramento exterior do peirao, que estaba fóra de uso pola rotura de varios faldóns laterais de protección, con elementos modulares prefabricados e sistemas de defensa para os barcos bateeiros. A zona de actuación céntrase nuns 30 metros na cara exterior leste, e tamén se mellorará o resto da estrutura.
Durante a visita, Botana Rey explicou que o proxecto tivo que ser modificado ao detectarse problemas de resistencia do peirao durante as tarefas preliminares. Por iso, o reforzo da resistencia da estrutura planificouse en dúas fases. A primeira, que está en execución xunto coa reconstrución do paramento, reforzará o tramo que se está a refacer. A segunda fase, xa en tramitación, completará o reforzo do total do peirao.
