A Consellería de Medio Ambiente e Cambio Climático, por medio de Augas de Galicia, colocou un total de 21 paneis informativos en distintos puntos dos ríos Presa e Postillón, ao seu paso polo concello de Cangas de Morrazo. O obxectivo é concienciar á cidadanía sobre os perigos asociados a episodios de chuvia intensa e informar sobre as medidas preventivas e pautas de actuación recomendadas.
En concreto, instaláronse 11 carteis no río Presa (6 reducidos, 2 xerais con 2 caras, 2 xerais con 1 cara e 1 infantil) e 10 no río Postillón (3 reducidos, 3 xerais con 2 caras, 2 xerais con 1 cara e 2 infantís) na Área de risco potencial significativo de inundación (Arpsi) destes ríos.
Segundo o Plan de Xestión de Risco de Inundación (PXRI) da Demarcación Hidrográfica Galicia-Costa, esta zona pertence ao grupo IV, que inclúe as áreas fluviais de maior perigosidade por desbordamentos. A colocación destes elementos busca mellorar a concienciación pública e reforzar a seguridade cidadá.
Esta iniciativa forma parte do Plan estratéxico de divulgación das áreas de risco potencial significativo de inundación (Pedarpsi) e dá continuidade a traballos similares noutras zonas de Galicia-Costa. Ata o momento, Augas de Galicia xa instalou indicadores similares en 34 concellos con áreas de alto risco, incluíndo localidades como Gondomar, Ames, Brión, Bueu, Sanxenxo, Vilagarcía de Arousa, Carnota, Vimianzo, Zas, Carballo, Ponteceso, Cabana de Bergantiños, Arteixo, Sada, Fene, Ferrol, Neda, Cedeira, As Pontes de García Rodríguez, Betanzos, A Pobra do Caramiñal, A Coruña, Baiona, Oia, Cambre, Culleredo, Oroso, Santiago de Compostela, Cuntis, Cambados, Ribadumia, Vilanova de Arousa, Vilaboa, Vigo e agora Cangas.
Augas de Galicia combina diferentes formatos de carteis, como os xerais, que inclúen información específica e protocolos de actuación, ou os infantís, adaptados á idade dos máis novos. Deste xeito, o organismo reforza o seu compromiso coa prevención e xestión sostible de asolagamentos, en colaboración coas administracións locais e autonómicas e cumprindo co PXRI vixente ata 2027.
En Cangas, estes traballos contan cun investimento de máis de 8.000 euros e enmárcanse no contrato para a prestación do servizo de concienciación e divulgación do risco de inundación. Ademais, dentro do Pedarpsi, realízanse obradoiros en centros educativos próximos ás áreas de risco para concienciar ás novas xeracións sobre os asolagamentos e a influencia humana nas contornas fluviais.
