A eliminatoria polo ascenso á Preferente Galicia comezou cun lixeiro atraso debido a unha avaría no autobús do Marín. Ademais, o encontro contou cunha notable presenza policial. Dende o inicio, quedou patente que a resolución da eliminatoria decidiríase por pequenos detalles.
A primeira xogada polémica chegou no minuto 3, cando o Córgomo reclamou a expulsión dun xogador visitante por unha agresión sen balón sobre Diegas, que rematou sangrando, aínda que o colexiado non amosou cartolina ningunha. Ao longo da primeira metade, os locais tiveron varias aproximacións claras, con disparos de Dani Real e Abi, pero o porteiro visitante estivo acertado. O Marín tamén tivo as súas oportunidades, incluída unha falta perigosa dende a frontal.
Tras o paso polos vestiarios, o escenario cambiou. O Marín adiantou liñas e pasou a dominar o xogo, mentres no horizonte comezaban a aparecer nubes ameazantes. Unha desafortunada acción entre Deivis e o meta Cristian provocou un susto, aínda que o porteiro puido continuar. O ceo comezou a descargar con forza, convertendo o terreo de xogo nunha batalla contra os elementos.
Nunhas condicións extremas, o Marín intensificou o seu asedio. Nos últimos minutos, unha ocasión clara puido decidir o partido, pero a acumulación de auga no terreo de xogo freou o balón no momento decisivo, impedindo un remate claro. Finalmente, o marcador reflectiu un empate a cero que deixa todo pendente para o partido de volta.
