A infraestrutura, impulsada pola Xunta de Galicia cun investimento superior aos nove millóns de euros, permitirá ampliar servizos e mellorar a capacidade de resposta sanitaria no municipio. O conselleiro de Sanidade, Antonio Gómez Caamaño, explicou que o novo modelo garante cobertura urxente mediante a presenza dun médico e unha enfermeira polas tardes, mentres que pola noite o servizo será a través dunha ambulancia de Soporte Vital Avanzado.
O obxectivo é que estes profesionais permanezan sempre no centro de saúde, sen desprazamentos a domicilios, que serán asumidos polo PAC de Cangas. Esta organización busca maximizar a calidade asistencial cos recursos dispoñibles, tendo en conta as características demográficas e o incremento de poboación estacional.
Un dos principais reforzos é a ampliación a 24 horas do servizo de ambulancia de soporte vital avanzado con enfermería, que mellorará significativamente a capacidade de resposta ante emerxencias graves e patoloxías tempo-dependentes como infartos ou ictus.
“"Contar cunha ambulancia de soporte vital avanzado as 24 horas supón un salto moi importante en capacidade de resposta."
O novo centro de saúde de Moaña conta con máis de 3.500 metros cadrados e incorpora novas consultas de medicina, enfermería, pediatría, odontoloxía, fisioterapia, ecografía e áreas polivalentes.
A alcaldesa de Moaña, Leticia Santos, cualificou a xornada como "un día histórico" e destacou a colaboración institucional, lembrando que o Concello cedeu a parcela para o novo edificio, situado nunha zona céntrica e accesible.
