Os espectáculos terán lugar nas naves de Ojea a partir das 22:00 horas e están financiados a través da nova edición de +Música, un programa provincial que colabora cos concellos de menos de 50.000 habitantes da provincia para apoiar a súa programación cultural e difundir e fomentar a lingua e a cultura galegas.
O primeiro grupo en actuar será Nacho · Faia · Lar, formado por Nacho Muñoz (Igmig) ao piano e electrónica, Faia Díaz (FAIA, de Vacas) na voz e Lar Legido (Sumrrá) na batería. O seu proxecto musical, titulado “De não saber o que me espera”, afonda na figura e repertorio do cantante portugués Zeca Afonso desde unha perspectiva transgresora e contemporánea.
A continuación, actuará Alana, proxecto de Antía Vázquez, Eloy Vidal e Pablo Castro. O seu traballo mestura a música tradicional con ritmos de base electrónica e pop, partindo das recollidas do Cancioneiro Popular Galego. O seu primeiro disco, “O xeito á cántigha”, foi gañador do Premio Xuventude Crea na categoría de música e do concurso de bandas do Festival Internacional do mundo celta de Ortigueira, entre outros recoñecementos.
Estes concertos forman parte das 93 actuacións de +Música que se celebrarán entre maio e decembro en 58 concellos de menos de 50.000 habitantes da provincia. O programa conta cun orzamento de 700.000 euros, co que a Deputación impulsa a cultura na provincia e a reputación de Pontevedra como destino cultural.
