A Xunta de Galicia destinará 1,7 millóns de euros, o 70% do orzamento total, para a mellora e humanización dun tramo da estrada PO-315 ao seu paso por Bueu. O acordo, asinado polo presidente autonómico, Alfonso Rueda, e o alcalde do municipio, Félix Juncal, prevé unha transformación integral da avenida Pazos Fontenla cun investimento global de 2,4 millóns de euros.
O obxectivo principal é gañar espazo para os peóns, creando un bulevar máis accesible, verde e seguro. Esta vía, que vertebra a vila e pola que circulan unha media de 4.200 vehículos diarios, será adaptada para o desfrute dos veciños e visitantes, fomentando tamén o comercio local. As obras abranguerán algo máis dun quilómetro, entre o cruzamento da Escola Náutica e a contorna da Fonte da Abilleira.
Os traballos incluirán a renovación do pavimento, a ampliación das beirarrúas, a incorporación de espazos de descanso e estacionamentos puntuais. Tamén se substituirán as redes de saneamento e abastecemento e implementaranse solucións de drenaxe para previr inundacións. Unha vez finalizadas, a vía será transferida ao Concello.
Alfonso Rueda destacou a importancia da colaboración entre administracións para impulsar proxectos ambiciosos. Lembrou que a Xunta e o municipio de Bueu xa colaboran noutras iniciativas, como unha nova senda peonil entre Lapamán, Cela e Castrelo (cun orzamento de 875.000 €), e na cesión de terreos para a construción de 21 vivendas de promoción pública na zona das Lagoas.
