A formación nacionalista respondeu así a un comunicado previo do rexedor, no que, segundo o BNG, se empregaban documentos internos para atacar a labor da oposición. O grupo municipal subliña que as súas intervencións nos plenos teñen como obxectivo "exclusivamente" fiscalizar a política de persoal do equipo de goberno, unha función que a lexislación atribúe á oposición.
“"Preguntar polos criterios de asignación de tarefas, produtividades, nomeamentos temporais ou organización interna non é un ataque ao persoal afectado, senón un deber democrático."
O BNG lamenta que o alcalde mesturase a crítica política á xestión gobernamental cunha suposta crítica aos empregados públicos. A formación destaca que os propios escritos dos traballadores solicitan non mesturar a súa actividade profesional coa confrontación política, unha petición que consideran vulnerada polo rexedor.
Ademais, o grupo nacionalista considera que o "uso deliberadamente torticeiro" destes documentos só se explica como "unha acción desesperada para intentar distraer da súa incapacidade para resolver os problemas existentes na política de persoal, que son responsabilidade exclusiva deste goberno".
Ante esta situación, o BNG de Cabanas reafirma o seu compromiso cunha oposición "seria, rigorosa e respectuosa", centrada en garantir a transparencia e a legalidade. O comunicado conclúe cunha mensaxe de tranquilidade para os traballadores municipais, asegurando que continuarán coa súa labor de fiscalización "con responsabilidade" e dentro dos límites regulamentarios, confiando en que a plantilla entenda que o debate político sobre a xestión non é un cuestionamento da súa profesionalidade.
