O Diario Oficial de Galicia (DOG) publicou o anuncio de Turismo de Galicia sobre a apertura do trámite de información pública para un proxecto que busca mellorar a seguridade viaria nos tramos do Camiño de Santiago que coinciden con estradas. A iniciativa, que terá un período de obxeccións de 30 días hábiles, céntrase en dotar aos camiñantes dun espazo físico segregado para a súa seguridade.
En Cabanas, a actuación é especialmente relevante, xa que concentra a maior superficie de expropiacións de todo o plan. O obxectivo é crear unha ruta alternativa e segura no entorno do polígono de Vilar do Colo, onde a travesía de Pereiro da N-651 presenta interseccións e un tramo perigoso debido á alta intensidade media diaria de tráfico, que rolda os 10.000 vehículos.
Naqueles tramos de coincidencia do trazado do Camiño de Santiago con estradas da rede primaria, secundaria ou complementaria, é imprescindible dotar aos peregrinos dun espazo físico segregado por onde poidan discorrer con seguridade.
Para solucionar esta situación, Turismo de Galicia propón un trazado complementario do camiño dende a rotonda de acceso ao parque industrial de Vilar do Colo, separado das estradas. Esta alternativa, que se acometerá en varias fases, incluirá unha senda de 2,3 metros de ancho con pavimento de solo estabilizado e unha pontella de pedra de 14 metros de lonxitude para cruzar un pequeno arroio. A ruta, duns 300 metros, aproveitará camiños existentes para minimizar o impacto paisaxístico e, ademais, recupera parte dunha antiga ruta xacobea.
As expropiacións necesarias para este proxecto afectarán principalmente a administracións públicas, sendo a Entidade Pública Empresarial de Solo a máis afectada con catro fincas que suman máis de 5.800 metros cadrados. O Ministerio de Transportes e Mobilidade Sostible tamén verá afectados 930 metros cadrados. O impacto sobre propiedades privadas será mínimo, identificándose só a unha particular cun terreo de 227 metros cadrados e unha ocupación temporal de 1.622 metros dun titular descoñecido. O prazo para presentar alegacións remata o 14 de maio de 2026.
