O proxecto, presentado na Asociación Cultural Alexandre Bóveda, busca dotar ao mosteiro dun relato museográfico que permita comprender a súa importancia histórica, cultural e territorial. O deputado de Patrimonio, Xosé Penas, xunto co xefe de Arquitectura da Deputación, Daniel Beiras, e o director do proxecto, Adolfo Seler, participaron no acto.
O deputado Xosé Penas subliñou que a intervención vai "moito máis alá dunha intervención nun edificio histórico e patrimonial", xa que busca "darlles voz a esas pedras" e explicar o papel do mosteiro como "peza fundamental e indispensable para comprender a historia de Galiza como país, e ao mesmo tempo como o reino que foi".
A iniciativa nace dunha reflexión política iniciada hai tres anos e supón un paso máis aló da mera conservación arquitectónica, buscando a divulgación e a posta en valor da memoria colectiva. Penas destacou a necesidade de que Caaveiro sexa un espazo para coñecer e comprender a historia, e non só un escenario para fotografías.
Definiu a proposta como a creación dun "museo de reflexión" dirixido a escolares, familias e visitantes, que explique o papel dos mosteiros galegos como motores económicos, centros de poder, espazos culturais e na articulación do territorio. Tamén reivindicou a importancia de descentralizar a oferta cultural cara ao rural.
O proxecto de Caaveiro inspírase en modelos europeos de musealización de conxuntos monásticos, como os de San Juan de la Peña (Aragón), Santa María de Ripoll (Catalunya), Tibães (Portugal) ou as abadías de Fontenay (Francia) e Fountains (Reino Unido). A paisaxe das Fragas do Eume considérase parte do discurso interpretativo, integrando a experiencia da visita coa contorna natural.
Esta musealización enmárcase na visión de turismo cultural e territorial da Deputación, promovendo visitas respectuosas co medio ambiente e xeradoras de valor engadido na comarca. Penas concluíu que o proxecto é un "compromiso co presente e co futuro de Galiza", buscando que os visitantes comprendan "quen somos como pobo e como país".




