Os feitos ocorreron durante un servizo de vixilancia e prevención do furtivismo de lamprea no termo municipal de Ponteareas. Os axentes observaron a unha persoa no leito do río cunha fisga con varios dentes-arpóns, un tipo de arte de pesca prohibida, e que acababa de capturar unha lamprea.
Ao decatarse da presenza policial e ser requirido para unha inspección, o individuo fuxiu pola maleza, ignorando as indicacións dos gardas civís. Os axentes puideron ver como levaba a arte prohibida nunha man e a lamprea capturada na outra mentres escapaba do lugar.
Posteriormente, identificouse ao investigado, quen estaba acompañado por outro home que se atopaba nun punto estratéxico para alertar da presenza dos corpos policiais ao pescador. A Garda Civil informou de que estes feitos serán postos en coñecemento da autoridade competente.
“"A colaboración cidadá resulta fundamental para preservar os recursos pesqueiros e garantir o respecto á normativa vixente."
O instituto armado recomenda á cidadanía colaborar activamente na protección do medio natural. Ante calquera indicio de pesca ilegal, como o uso de artes prohibidas, capturas fóra de talla ou actividade en zonas restrinxidas, aconséllase non intervir directamente e comunicalo de inmediato a través do teléfono 062.
