A directora xeral de Planificación e Ordenación Forestal, Luisa Piñeiro, inaugurou hoxe en Ponteareas (Pontevedra) o seminario técnico "Sanidade e mellora dos montes de Pinus Pinaster", organizado polo Grupo operativo Planforlab. O evento reuniu a investigadores, representantes de persoas propietarias forestais de Galicia e Portugal, e empresarios do sector do pino para reflexionar sobre a situación actual dos bosques desta conífera.
Na súa intervención, Piñeiro destacou a comunicación e colaboración entre os implicados no sector, así como a innovación e a investigación, como motores fundamentais para o futuro da industria forestal. O encontro incluíu presentacións sobre o grupo organizador e o bosque laboratorio de Xinzo-Ponteareas, ademais de mesas de debate sobre a sanidade dos piñeiros, a mellora xenética, a selvicultura e a demanda de madeira.
A directora xeral sinalou a necesidade de avanzar na mellora xenética e na aplicación de técnicas silvícolas adaptadas aos montes galegos para incrementar a produtividade, mellorar a calidade da madeira e reforzar a súa resistencia fronte a pragas, enfermidades e ao cambio climático. Tamén puxo en valor o papel da investigación e a innovación para garantir a sustentabilidade e rendibilidade económica dos piñeirais, subliñando a importancia de estreitar a colaboración entre centros de investigación, propietarios forestais e empresas madeireiras.
Iniciativas como Planforlab, que emprega o concepto de "bosque laboratorio" para a experimentación e investigación, son clave para mellorar a saúde e produtividade dos bosques de coníferas mediante innovacións en material xenético e silvicultura adaptativa. Estes traballos permitirán avaliar o comportamento das masas forestais e aplicar os resultados ao territorio, contribuíndo á súa resiliencia e capacidade produtiva.
