A rexedora de Ponteareas, Nava Castro, en nome dos concellos acolledores, ofreceu unha recepción oficial a quince nenos e nenas saharauís de entre 8 e 12 anos. Proceden dos campamentos de refuxiados de Tinduf e pasan o verán nos concellos de Ponteareas, Mondariz, Covelo e Salvaterra.
A súa estancia é posible grazas ao programa solidario "Vacacións en Paz", xestionado pola Delegación Saharaui en Galica e a Asociación Solidariedade Galega co Pobo Saharaui (SOGAPS), coa colaboración do concello de Ponteareas, a Xunta de Galicia e outros concellos.
No acto institucional, a alcaldesa estivo acompañada pola concelleira de Benestar Social, Raquel Plana, o de Xuventude, Cristian Montes, o de Comercio e Ensino, Ricardo González, e a concelleira de Urbanismo, Silvia Fernández. Os menores estiveron acompañados pola delegada de zona de SOGAPS, Conchi Fernández, e algunhas familias de acollida.
A concelleira Raquel Plana deu a benvida aos pequenos, desexando que a experiencia sexa positiva e agradable. Conchi Fernández, delegada de zona de SOGAPS, agradeceu a colaboración do Concello, "pioneiro no apoio ao programa e un dos máis acolledores nos difíciles primeiros anos", e da comunidade do Condado-A Paradanta. Lembrou a "importancia de visibilizar a situación do pobo saharauí e de manter vivos estes lazos culturais, solidarios e afectivos".
A alcaldesa Nava Castro destacou o compromiso histórico do municipio con este programa humanitario, sinalando que Ponteareas foi un dos concellos pioneiros en Galicia en apoiar "Vacacións en Paz", xa na época de José Castro como alcalde e con Juan José Castro como responsable de Servizos Sociais. "O concello vai a seguir dando o seu apoio sen dubidalo, pola enorme importancia social do mesmo", afirmou.
Castro subliñou que a iniciativa reafirma os valores de solidariedade e cooperación internacional do pobo ponteareán. Agradeceu tamén a xenerosidade das familias de acollida, ás que definiu como "o motor imprescindible desta cadea solidaria".
Jira Mohamed, filla de Mohamed Abdelaziz (expresidente da República Árabe Saharaui Democrática), lembrou os máis de 40 anos do programa e agradeceu o "tremendo esforzo para acoller aos nenos como se foran os seus fillos". Afirmou que o programa supón "un apoio claro a unha sociedade que quere ser oída, que quere ser libre, e as nenas e nenos son os mellores embaixadores".
O programa "Vacacións en Paz" proporciona aos menores cobertura sanitaria, social e humana. O obxectivo é afastalos das extremas temperaturas do deserto (máis de 50 graos) e ofrecerlles atención médica, analíticas, exames ópticos e bucodentais gratuítos. Tamén reciben unha dieta variada para paliar a anemia e malnutrición, e participan en actividades que fomentan o intercambio cultural e o desenvolvemento de habilidades en galego e castelán, ademais de visibilizar a situación do pobo saharauí.
Os 15 menores continuarán coa súa axenda de actividades e convivencia familiar na comarca ata finais de agosto, cando regresarán aos campamentos de Tinduf.
