O conselleiro de Emprego, Comercio e Emigración, José González, acompañado pola directora xeral de Formación e Cualificación para o Emprego, Zeltia Lado, comprobou hoxe no Carballiño as actuacións que se están a realizar no marco do programa piloto de formación teórico-práctica 'RenÓbrate'. Esta iniciativa desenvólvese coa Fundación Laboral da Construción e conta coa colaboración do municipio ourensán, xunto con Arteixo, Sanxenxo e Santiago de Compostela. González puxo en valor a formación para o emprego adaptada ás necesidades de man de obra de sectores estratéxicos como o da construción.
O programa 'RenÓbrate' brinda a persoas desempregadas cualificación centrada nas familias profesionais de Edificación e Obra civil así como Industrias Extractivas. No caso concreto do Carballiño, son 20 as persoas participantes, que recibirán máis de 500 horas de formación, incluída a de prevención de riscos laborais. O alumnado centrarase en tarefas de albanelería e pavimentos urbanos, mediante a reforma e acondicionamento de locais municipais e actuacións en espazos públicos, como o Parque do Carballiño.
González sinalou que accións coma esta axudan a facer fronte a retos globais do sector da construción, como a cobertura de vacantes laborais. A iniciativa desenvolverase ao longo de nove meses co obxectivo de facilitar a inserción laboral do alumnado participante no prazo máximo de dous meses desde a finalización do programa, mediante contratos a xornada completa en empresas do sector.
Esta acción complétase coas liñas de programas mixtos en colaboración coas entidades locais, como os obradoiros duais de emprego, para dar resposta ás necesidades de talento dun sector estratéxico. A formación é flexible, áxil e conectada coas necesidades do territorio, dirixida tanto a ocupados como a desempregados. Complementa medidas para a atracción de talento, enfocadas no retorno de galegos do exterior e na captación de traballadores de terceiros países.
