A iniciativa, impulsada polo grupo municipal socialista, busca responder a unha demanda da veciñanza de Palmeira e aproveitar a oportunidade de recuperar un inmoble con gran valor histórico e simbólico. O edificio, situado nunha contorna privilexiada, foi no pasado unha fábrica de salgadura e, posteriormente, un cine e unha pista de baile, formando parte da memoria colectiva de varias xeracións.
“"Dotar Palmeira dunha casa de cultura ou dun centro social público é un equipamento que permitiría reforzar a actividade cultural e social da parroquia, favorecer a participación veciñal e dinamizar a vida comunitaria."
O voceiro socialista, Francisco Suárez-Puerta, subliñou a importancia de dotar a Palmeira dun equipamento cultural público, especialmente pola escaseza de solo dispoñible na zona consolidada. A recuperación de espazos xa existentes como o antigo cine Millán faise, polo tanto, especialmente relevante para o desenvolvemento cultural e social da parroquia.
A proposta contempla a creación dun espazo cultural polivalente que poña en valor os elementos industriais da antiga fábrica. Ademais, recuperaríase a súa dimensión cultural cunha pequena sala de proxección en homenaxe ao antigo cine, xunto con espazos dedicados a actividades sociais, culturais e educativas. Esta rehabilitación non só busca restaurar un edificio, senón tamén devolver á veciñanza un lugar que xa foi seu e que segue moi presente na memoria colectiva.
A comarca do Barbanza chegou a contar con dezanove salas de proxección, con nomes como O Filipino, Gran Vía, Abadiño, Moraña, Millares ou Colón. Hoxe en día, só os Multicines Barbanza en Ribeira permanecen activos. Outros cines históricos como o Cine Puebla na Pobra (1917), o Cine Elma (1950) tamén na Pobra, ou os catro cines de Rianxo (Taragoña, El Centro de Asados, Avenida e Rianxo) e os seis de Boiro, incluíndo o mítico Gran Vía, foron desaparecendo co tempo debido á competencia e á chegada de novas tecnoloxías como a televisión e as plataformas dixitais.
