O evento, organizado pola Asociación Cultural Francisco Lorenzo Mariño, congregou a medio cento de asistentes, incluíndo membros da Corporación municipal e do Goberno local de Ribeira, como as concelleiras de Cultura, Ana Barreiro, e de Educación, Juana Brión, ademais do tenente de alcalde, Vicente Mariño.
Entre os presentes tamén se atopaban figuras destacadas do tecido social, como José Manuel Vilas, presidente do Xuventú Aguiño; José Antonio Santamaría, patrón maior de Aguiño; e Elvira Pisos, presidenta da Asociación Francisco Lorenzo Mariño, xunto a outros directivos da entidade.
A presentación foi conducida por Unai González, vicepresidente da asociación cultural, e contou coa intervención de Xabier López Marqués, escritor, profesor e doutor en Filoloxía Hispánica. López Marqués realizou unha análise detallada dos aspectos literarios da novela, explorando os seus personaxes, a temporalidade e o estilo lingüístico.
“"Sorprendeume polo ben escrita que está; a pesar de ser unha primeira novela da autora, ben podía ter sido a derradeira, pola calidade literaria da mesma."
Pola súa banda, Carmen González expresou o seu agradecemento á asociación pola organización do acto e a Xabier López polos seus eloxios e o apoio incondicional desde os inicios do proxecto, cando a obra era só un bosquexo. A autora tamén recitou un poema durante o evento.
A novela A Forcadiña, de xénero policiaco, está ambientada en lugares de Aguiño e Ribeira, e transcorre entre a actualidade e a década dos oitenta. A obra aborda temáticas sociais relevantes como o maltrato, o feminismo e o movemento LGTBIQ+. A portada do libro, que representa a illa de Sagres, foi deseñada polo seu fillo, Carlos.
Un aspecto solidario da publicación é que o dous por cento da recadación obtida polas vendas do libro será destinado á Asociación Coruñesa de Esclerosis Múltiple.
