O sinistro ocorreu preto do quilómetro 25 da citada vía, á altura do número 153 da rúa Principal. O coche, no que o falecido viaxaba só, derribou unha farola e impactou violentamente contra unha árbore, quedando nunha zona próxima a un terraplén.

A alerta chegou ao 112 Galicia pouco despois das 06:40 horas, tras o aviso dun particular que observou dende a súa vivenda como o turismo se saía da calzada e corría risco de caer cara a un río.

Efectivos do Servizo de Urxencias Sanitarias de Galicia-061, os bombeiros de Boiro e Ribeira, a Garda Civil de Tráfico, membros de Protección Civil e o persoal de mantemento da vía desprazáronse ao lugar. Os bombeiros tiveron que realizar tarefas de excarceración para liberar ao condutor.

A pesar dos esforzos dos equipos sanitarios desprazados, non puideron facer nada por salvar a vida do mozo, confirmando o seu falecemento no punto. As circunstancias exactas que provocaron o accidente están a ser investigadas polas autoridades.